О ЗАЧАЛЕ ЦАРСТВУЮЩЕГО ВЕЛИКОГО ГРАДА МОСКВЫ, КАКО ИСПЕРВА ЗАЧАТСЯ

Вся убо християнская царьства в конец преидоша и снидошася во едино царьство нашего великого государя по пророческим книгам, то есть Российское царство: два убо Рима падоша, третий же стоит, а четвертому не быти. Поистинне же сей град именуется третий Рим, понеже и над сим бысть в начале то же знамение, яко же и над первым и вторым; и аще и различно суть, но едино кровопролитие. Первому бо Риму зиждему от Рома и Ромила, и егда мастеры начата созидати и ров копающе, обретоша главу внове закланна человека, нову и теплу, кровь точащу и лице являющу к живым прилично, ея же увидевше ентинарий искусний знамением смотритель и рече, яко сей град глава будет многим, но во времени и по заклании и по пролитии кровей многих. Такожде и второму Риму, си речь Констянтину полю626 здания зачало бысть не бес крове же, но по заклании и по пролитии кровей многих. Сице же и нашему сему третиему Риму, Московскому государьству, зачало бысть не без крове же, но по пролитии же и по заклании кровей многих. Аще бо нецыи от окрестных стран, враждующе, поносяще ему сице глаголюще: «Кьто убо чая или слыша, когда яко Москве (л. 287 об.) граду царством слыти и многими царствы и странами обладати, и сии убо немощию человеческою. О бложены суть не разумеюще силы Божия, ни пророческих речений, яко всемощен Бог и от несущаго в сущее привести, яко же искони во вселенную.

В лето убо 6633 (1125), по преставлении благоверьнаго царя и великого князя Владимира Всеволодича Монарха, седе на великом княжении в Киеве сын его князь Юрьи Владимировичь Монамах627, а сынов его, Всеволод Юрьевич з братиею, с ним быша, а старейшаго сына своего князя Андрея Юрьевича Боголюбиваго посади на Суждале и Владимире.

В лето 6666 (1158)628 великому князю Юрью Владимировичю грядущу ис Киева во Владимир град к сыну своему князю Андрею Юрьевичю и прииде на место, иде же ныне царьствующий град Москва, обо полы Москвы реки села красныя, сими же селы владающу тогда болярину некоему богату сущу, имянем Кучку Стефану Иванову. Той же Кучка возгордевься зело и не почте великого князя подобающею честию, яко же довлеет великим князем, но и поносив ему к тому ж. Князь великий Юрьи Владимирович, не стерпя хулы его той, повелевает того болярина ухватити и смерти предати. И сему тако бывшу, сыны же его, видев млады суща и лепы зело, имянем (л. 288) Петр и Аким, и дщерь едину такову ж благообразну и лепу сущу, именем Улиту, отосла во Владимир, к сыну своему ко князю Андрею Юрьевичю. Сам же князь великий Юрьи Владимировичю взыде на гору и обозрев с нея очима своима семо и овамо по обе страны Москвы реки и за Неглинною, и возлюби села оныя и повелевает на месте том вскоре соделати мал древян град и прозва его званием реки тоя Москва град, по имени реки текущия под ним. И потом князь великий отходит во Владимир к сыну своему князю Андрею Боголюбскому и сочетовает его браку со дщерию Кучковою, с нею же князь Андрей и сыны приживе, но млады отьидоша к Богу. И быв у него отец его великий князь Юрьи Владимирович довольно время и заповеда сыну своему князю Андрею Боголюбскому град Москву людьми населити и распространити. И паки возвращается великий князь Юрьи Владимирович в Киев, с ним иде и сын его князь Андрей Юрьевич Боголюбский. И того ж лета ис Киева возвратися паки князь Андрей Юрьевич во Владимир и принесе икону с собою ис Киева во Владимир пресвятыя Богородицы, ею же прежде сего принесена из Царя града, и украси ю боле 30 гривен злата, кроме сребра и драгаго камения и жемчюгу, и созда церковь каменную Успение, пречистыя Богородицы и верх ея позлати и постави в ней икону пречистыя Богородицы, и вда ей села лутчая и десятая (л. 288 об.) во всем. Сей убо благоверный великий князь Андрей все упование свое возложи на господа Бога и на пречистую его матерь, ни о чесом земном печашася, но токмо достизаше небесная и яко орел ношашеся перием высокопарным и лехце возношашеся по воздуху к добродетелем и во устех его бе глагол медоточный, и долу легание на жестокой посланней постели и плотскаго смешения с женою до конца ошаяся, ниже во снех ему соблазны женская мечтахуся, паче же рещи, яко звездам уподобляшеся всяким сладкодушевным, церкви созидая и нищих удовляя, удаляясь убо удалися от нея и отбежа бегая и особяшеся назде бысть птица, и нощный вран на нырищи, но сия вся неугодная бысть жене его, требоваше бо пригорковения и плотскаго смешения. И присно преж помяным шурьям его Кучковичем возрастшим и живущим у великого князя Андрея Юрьевича в велицей чести. С ними убо жена его совещася зломыслием на господина своего великого князя Андрея Юрьевича. И по некоем времени отай приведе их к ложу мужа своего и предаде в руце врагом супружника своего, яко Далида Самшона и яко убивственная Тиндарида сожителя своего храбраго Ироя. Кая убо щенца кормящая лвица дерзну когда таковая сотворити или кая злогневная мечка сице содея? Вскочиша убо убийцы онии окаяннии Кучковичи со оружием к нему, яко злейший пси, и обретают великого (л. 289) князя на худе лежаща долу легании.

В лето 6683 (1175) июня в 29 день убивают его немилостивно. Имяше же во устех божественная словеса и кровь убо течаше по земли праведного, яко же древле Авелева, еще же и ино зло приложиша к тому и тело его предати водам, но убо сие не утаися всявидящему оку Божию, но вскоре на убийцы они суд постиже еже явленно есте всем.

В лето 6684-го (1176) прииде ис Киева во Владимир брат его князь Михайло Юрьевич и изби убийц оны брата своего, и телеса их вверже во езеро, а сноху свою, жену брата своего, повеле повесити на вратех и растреляти изо многих луков, да накажутся и протчии впредь таковая творящий. И сяде на великом княжении во Владимире великий князь Михайло Юрьевич, лето едино пребысть на великом княжении и умре.

И в лето 6685-го (1177) (седе) на великое княжение во Владимире великий князь Всеволод Юрьевич и пристави к церкви святыя Богородицы 4 верхи, ю же брат его созда князь великий Андрей Боголюбский, и позлати я, а на своем дворе постави церковь каменну великомученика Димитрия и верх ея позлати. И бысть имя его славно во всей земли и на татарех дань имал и владяше всею землею Рускою, и до моря Волгою, 35 лет княжив и преставися в лето 6720-го (1212) апреля в 25 день (л. 289 об.).

И по нем начаша княжити сынове его и сродичи его и быша между ими брани мнози, и нахождение поганых татар на Рускую землю, и пленение Руской земли, и побиение многих князей русских от татар. И бысть княжение их лет 25. По сем начат княжити во Владимире великий князь Юрьи Всеволодович, при нем же бысть Батыевщина.

В лето 6745-го (1237) за умножение грех ради наших приходил на Рускую землю злочестивый царь Батый. Тоя же зимы взяша татарове град Москву и князя Владимера Юрьевича и воеводу его Филиппа Нянина убиша и вся люди посекоша и поплениша. И в лето 6746-го благоверный великий князь Владимирский Юрья Всеволодович убиен бысть от безбожных татар на реке на Сите. Кирил же епископ, иде з Бела озера, взят тело великого князя и положи е(го) в Ростове в церкви у пресвятыя Богородицы. Сынове же его после осташася: Всеволод, Мстислав, Владимир. Того ж году 6746-го прииде из Великого Новаграда брат великого князя Юрья Ярослав Всеволодович и седе на великом княжении (в) Володимере, а сына своего князя Александра остави в Великом Новеграде, и повеле привести тело брата своего князя Еоргия, и стрете его сам и весь град. Сей убо великий князь Еоргий Новеград Нижней созда и монастырь пречистыя Богородицы Печерския. Пребысть же на отчи престоле во Владимире 24 лета. Того же (л. 290) году 6746-го преставися князь великий Ярослав Всеволодович во Орде нужною смертию. И прииде из Великого Новаграда во Владимер великий князь Александр Ярославич и поиде к Батыю во Орду. Видев же его Батый удивися величеству и доброте его и почтив его отпусти.

В лето 6771-го (1262) ноября в 14 день преставися великий князь Александр Ярославичь Невский во иноцех и в схиме, и положен бысть во Владимире в церкви пресвятыя Богородицы, сынове же его Василий, Димитрей, Андрей, Данило Московский. И потом начаша княжити в Руской земли братия и сынове его, сын его великий князь Данило Московский. В то же лето быша на Рускую землю от татар насильства и зла многа. Быша же сынове великого князя Данила Московского: Юрий, Александр, Борис, Иван, Афонасей. Бысть же княжение сынов Александровых у великого князя Данила Московского лет 40. Сей князь Данило Александрович паче возлюби в Москве жительствовати, и созда его паче перваго, и гражданы насели, бе бо добродетелен и нищелюбив по премногу и к Богу имяше веру и молитву и слезы велия, и от того прославися наипаче Москва град. Поживе ж на Москве князь великий Данило Александрович лет 12 и преставися в лето 6811 (1303) марта в 4 день, и положен бысть в своем ему Даниловском монастыре. По нем начаша княжити в Руской земли сродники и сынове (л. 290 об.) его. Бысть княжения их лет 25.

В лето 6813-го (1305) прииде на Русь Петр митрополит, поставлен Афонасием патриархом цареградцким. В лето 6834-го (1326) заложена бысть на Москве церковь каменная соборная Успение пресвятые Богородицы. Той же зимы преставися преосвященный Петр митрополит Московский и всеа Росии декабря в 21 день в 3-м часу нощи и положен бысть в церкви святыя Богородицы, ю же сам созда.

В лето 6836-го (1328) седе на великом княжении владимерском и московском сын его князь Иван Данилович, зовомы Калита. Того же лета заложена церковь каменна святаго Иоанна Спасителя лествицы. Того ж лета 6838-го (1330) великий князь Иван Данилович построил на Москве церковь каменну Преображения господня у своего двора.

В лето 6841-го (1333) единем летом князь великий Иван Данилович построил на Москве церковь каменну архистратига Михаила.

В лето 6847-го (1339) великий князь Иван Данилович содела около Москвы новый древян град и укрепи его паче перваго. Во дни ж княжения его бысть на Руси тишина велия и начаша ему писати величество — великий князь Иван Данилович Владимирьский и Московский и всея Росии.

В лето 6859-го (1351) преставися князь великий Иван Данилович Калита марта в 31 день, и положен бысть на Москве в церкви архистратига Михаила (л. 291). Сынове же его осташася Симеон, Иван.